• Gerardo Gutiérrez Ardoy impartiu unha clase maxistral en ERLAC durante a que relatou a historia da lexislación e planificación en materia de emprego en España.
• O maxistrado do Tribunal supremo Ignacio García-Perrote Escartín e o catedrático de Dereito do Traballo da Universidade Carlos III de Madrid impartirán clase este sábado clase no Máster Práctico en Xurisdicción Social.

ACoruña,24 de marzo de 2025.-O director xeral do Servizo Público de Emprego Estatal (SEPE), Gerardo Gutiérrez Ardoy, animou esta tarde ao alumnado do Grao en Relacións Laborais e Recursos Humanos de ERLAC (Universidade da Coruña) a estudar as súas opcións de futuro no eido do deseño e implementación de políticas de emprego, tanto no sector público como no privado. “Necesitamos persoas ben formadas para tarefas tan importantes como a da creación de itinerarios de emprego”, destacou. “Aínda que a tecnoloxía, especialmente a IA, está xa moi presente, non sempre vai dar os resultados idóneos. Cada día vai ser máis importante o factor humano”, subliñou.

O director do SEPE estivo na Escola Universitaria de Relacións Laborais e Recursos Humanos da Coruña para impartir unha clase maxistral na materia de Políticas Sociolaborais, que imparte a docente Susana Soneira Lema. Durante a súa intervención relatou a evolución da lexislación española en materia de emprego, desde a primeira norma de 1980 ata as últimas reformas laborais. Delas, Gutiérrez Ardoy destacou a inminente entrada en vigor do complemento de apoio ao emprego para, segundo dixo, incentivar a incorporación laboral de persoas que están cobrando a prestación contributiva, así como a reforma do nivel asistencial, co incremento das contías dos subsidios e a eliminación do mes de agarda entre as novidades incorporadas.

Docentes de máximo nivel nos mestrados

Tamén a programación dos mestrados de ERLAC caracterízase polo alto perfil profesional e o prestixio dos seus docentes. Esta mesma tarde, o Máster en Recursos Humanos e People Analytics contou cunha sesión a cargo da directora de Recursos Humanos de elPulpo, María José Vega, que tamén estará mañá, e o mércores será o turno da directora de Recursos Humanos Biomasa de Greenalia e ex alumna deste máster de ERLAC, Noelia Pedrouzo.

Pola súa banda, no Máster Práctico en Xurisdicción Social estarán este sábado como docentes o maxistrado da Sala do Social do Tribunal Supremo Ignacio García-Perrote Escartín e o catedrático de Dereito do Traballo e a Seguridade Social da Universidade Carlos III de Madrid Jesús Mercader Uguina.